الحالة الليبية اليمنية
- في اليمن 160 حالة اغتيال
في ليبيا 139 حالة اغتيال
مالنا شي أهم شي اوبهوا لا يلفونا
- في ليبيا تمديد للمؤتمر العام ( يعني المجلس التأسيسي ) لمدة سنه
في اليمن تمديد لهادي سنتين
لا تقلق يا هادي عيمددوا جنبك المؤتمر العام حق ليبيا
- اليمن يعيش حالة التدهور الأمني ومثله ليبيا حتى لجان التحقيق حقنا وحقهم سوى سوى يعني ما بش حد أحسن من حد
- اليمن فيدرالية إلى ستة أقاليم
ليبيا فيدرالية إلى ثلاثة أقاليم
ما هذه مدري كيف عملوها ما حسبوهاش صح
- الحروب موجودة لا تقلقوش بين القبائل في اليمن وليبيا وكله بدعم خارجي عندنا وعندهم بس احنا زايدين عليهم بحسين الخطير
- الشعب في البلدين بيطالب بحكومة إنقاذ وطني .. صيحوا لاما تشبعوا
- عندهم مجازر مثل ما عندنا فمثلا عندهم يوم السبت الأسود الذي راح ضحيته أكثر من أربعين قتيلا ومائة جريح ساع عندنا مجزرة سناح ومجزرة عمران بس الفارق بيننا أحنا وهم قدوه عندهم اسود واحنا عادو احمر
- القوى الحاكمة حاليا في ليبيا نفسها التي كانت مع القذافي وباسم الثورة مثل ما عندنا بالضبط … ديمه خلفنا بابها
- بس به حاجه إحنا زايدين عليهم قدحنا خارجين من مؤتمر الحوار وعادهم داخلين فيه … مدري أين كان المخطط راقد لاما نسيهم لليوم
- لكن الصدق عاد به معاهم حاجه ضخمة وهو المحلل السياسي عز الدين عقيل رئيس حزب ائتلاف جمهوري بطرابلس بيسلخ النظام والحكومة حقهم سلخ ما حقنا المعارضين ورؤساء الأحزاب بيدهونوا دهونة
- معاهم بنغازي ومعانا حجه مخيمات للنازحين
- الشئ الوحيد الذي إحنا متفقين معاهم في الإعلام الرسمي ( كل شئ تمام يا فندم ) يعني نسخ لصق ويمكن إن المحررين حق النشرات عندنا وعندهم واحدين بس بيداوموا عندنا النهار وعندهم بالليل … طلبة الله
- عندهم حلف الاتلسي ( بالترقيق ) وعندنا امريكووووووا ( بالتفخيم ) الحمد لله احنا أقوى منهم
- ما رئيس الوزراء حقهم قالوا انوه عنيد وما بيسمع احد ما حقنا لاحد كلمه يبكي على طول
وفي الأخير سؤال بحاجة إلى إجابة هل المخرج واحد ؟
التعليقات مغلقة.